Accueil forums

Forum général (tout sujet)
Discussions de comptoir
Café littéraire
Le patois Ch'ti
Le Nord-Pas-de-Calais
Les mineurs et la mine
Légendes et contes
Recettes de cuisine
Histoires drôles
Demandes de traductions
Webmaster à votre écoute

Livre d'Or

Café littéraire
Sujet :ch'tchiot prince VIII
cartouche06/07/2011 08:24
J’appris bin vite à miux connaîte ch’te fleur. Y avot toudis eu, sur l’planète de ch’tchiot prince, des fleurs très simpes, ornées d’un seul ring ed’pétales, et qui n’tenotent pas ed’plache, et qui n’déringeotent personne. Alles apparaichotent un matin dins l’hierpe, et pis alles s’éteignotent l’soir. Mais chelle là avot germé un jour, d’eune graine apportée d’in n’sait d’du, et ch’tchiot prince avot surqué ed’très près ch’te brindile. Cha pouvot ête un nouvieau genre ed’ baobape. Mais ch’l’arbuste cessa vite ed’croîte, et commincha ed’ préparer eune fleur. Ch’tchiot prince, qui assistot à ch’l’installation d’un bouton énorme, sintot bin qu’y in sortirot eune apparition miraculeusse, mais chelle fleur n’in finichot pas de s’préparer à ête bielle,à l’abri de s’champe verte. al’ cujissot avec soin ses couleurs. Al’ s’harnéquot lintemint, al’ ajustot un à un ses pétales. al’ voulot pas sortir toute fripée comme chés coquelicots. al’voulot apparaîte foque dins l’rayonnemint de s’bieauté. Eh ! ouais. Al’ étot très coquette ! S’tolette mystérieusse avot donc duré des jours et des jours. Et pis vla chi qu’un matin, justemint à l’heure de ch’ lever ed’ solèle, al’ s’est moutrée.

Et elle, qui avot ouvré avec tant ed’précision, dit in bâillant :
- Ah ! je m’révelle à peine…j’vous deminde pardon…j’sus incore toute decuffée….

Ch’tchiot prince, alors, n’put contenir s’n’admiration :
- Que vous êtes bielle !
- N’est-ce pas, répondit duchemint l’ fleur. ET j’sus née in même timps que ch’solèl…
Ch’tchiot prince devina bin qu’al’étot pas trop modesse, mais al’étot si émouvante !
- Ch’est l’heure, j’cros, de ch’tchiot déjeuner, avot-elle bintôt ajouté, arotes-vous l’bonté ed’pinser à mi…
Et ch’tchiot prince, tout confus, ayant été quère un arrosoir d’ieau fraîque, avot servi l’fleur.

Ainsi l’avot-elle bin vite tourminté par s’vanité un peu ombrageusse. Un jour , par exempe, parlant ed’ses quate épines, al’avot dit à ch’tchiot prince :
- Y peutent v’nir, chés tigues, avec leux griffes !
- Y a mi ed’tigues sur m’planète, avot objecté ch’tchiot prince, et pis chés tigues y ming’tent pas l’hierpe.
- J’sus mi eune herpe, avot duchemint répondu l’fleur.
- Pardonnez-me…
- Je n’crains pas chés tigues, mais j’ai horreur ed’ chés courants d’air. Vous n’arotes pas un paravint ?
Horreur ed’chés courants d’air… ch’est pas d’chance, pour eune plante, avot armarqué ch’tchiot prince. Ch’te fleur al’est bin compliquée…
- L’soir vous m’mettrez sous globe. Y fait frod chez vous. Ch’est mal installé. Là ed’du que j’viens…
Mais al’ s’étot interrompue. Al’ étot venue sous forme ed’graine. Al n’avot rin pu connaîte des autes montes. Humillée ed’s’ête laiché surprinde à préparer une mintirie aussi naïfe, al’ avot toussé deux ou tros cops, pour mette ch’tchiot prince dins sin tort :
- Ch’paravint ?...
- J’allos l’quère mais vous m’parlotes !
Alors al’avot forché s’toux pour y infligé quand même des armords.
Ainsi ch’tchiot prince, malgré l’bonne volonté de s’n’amour, avot vite douté d’elle. Y avot pris au sérieux des mots sans importance, et étot devenu très malheureux.
- j’aros pas du l’acouter, m’confia-t-y, un jour, y n’faut jamais acouter chés fleurs. Y faut les raviser et les respirer. L’mienne imbaumot m’planète mais je n’savos pas m’in réjouir. Ch’t’histoire ed’griffes, qui m’avot tellemint agacé, arot du m’attindrir…
Y m’ confia incore :
- J’ai rin su alors comprinde ! J’aros du l’juger sur ses actes et non sur chés mots. Al’m’imbaumot et m’éclairot. j’aros jamais du m’infuir ! J’aros du deviné s’tindresse derrière ses paufes russes. Chés fleurs sont si contadictoires ! Mais j’étos trop jones pour savoir l’avoir querre.
chelmy628026/07/2011 15:30
Merci Cartouche !!
je n'sais nin, mais j'cros qu't'es do étre inne gernoulle pour avoir eu inne idée si bonne et qué courache pour traduire tout cha !! bravo et incore merci !!
cartouche26/07/2011 22:25
ben non j'sus un coq , et pis j'vas mette l 'suite

Retour au forum

Utilisateur

Mot de passe


S'inscrire
Mot de passe oublié ?

Google

Connaissez-vous
ce mot ?
en ch'ti:tère
français:tendre
genre:adj.
Accéder au glossaire