Accueil forums

Forum général (tout sujet)
Discussions de comptoir
Café littéraire
Le patois Ch'ti
Le Nord-Pas-de-Calais
Les mineurs et la mine
Légendes et contes
Recettes de cuisine
Histoires drôles
Demandes de traductions
Webmaster à votre écoute

Livre d'Or

Café littéraire
Sujet :Tint pi ej mets l'tape !
jeangabelou5913/06/2010 06:41
Bonjour tertous, ch'est malheureux à dire, mais à peine étampé ej su obligé ed mette quécosse su m'dos, un n'sint sorte pus aveuc ech tans !
J'ai d'jà été querre min pain, j'étos el premier et m'tiote boulingère alle m'a d'mindé quo qui m'arrivot.

Bin sur ech matin ch'est pos ch'qui minque comme sujet ed conversation, el votache in Belgique, el pont qui est serré pou deux mos à partir d'main matin et ches jonnes qui comminchent à armuer d'un ches rues. Du reste hier in a d'jà eu un apperchu d'ech qui nos attind pindint les vagances. I n'a tros (des files) qui ont teurnées dins l'quartier su unne tiote pétrolette à tros reules (un quad), ch'est min visin, qui sait tout, qui l'a dit.In aurot dit tros guernoulles su unne bote d'alleumettes. Cha m'a fait busier à unne histore vièle ed sossante ans.

Min père i avot invie d'unne pétrolette, des s’maines intières i a collé s’n’eule su l’vitrine à Trognon (ch'bistro in face d'el fosse 16 ù i ouvrot). Des s'maines à bafier su sin menton, rin qu’à l’raviser.
Un biau jour el tintation ale a été pus forte, i est intré pou d‘mander sin prix, trop querre pou li bin sur. Mais i fallot compter aveuc l’roublardise d'ech bistrotier, i li a proposé des aringemints.
Contint, i a traversé tout l’cité in boutant s’pétrolette, d'el marque "hirondelle", du reste ch'étot marqué su l’réservoir rouche si gros qu’unne musette rimplie d’gaillètes.
Su sin quémin is ravisotte tertous, li souriot fin bénache su sin tiot nuache; pa i étot fort connu , in pus l’tableau i étot putôt cocasse.
Par conte, unne qui n’a pos ri in l’véyant arriver dins l’voyette, ch'est man. Ch’pauf diape i n’a intindu des vertes et des pos murtes :
- té d’viens maboule m’homme!
- té vas t’tuer, ch'est à peine si te sais rouler à vélo!!
- t’as l’air d’un crapaud su unne boite d’alleumettes!
- l’pus biau té vas t’ingeler d’frod, t’aras des romatikes su tes oches.
Du cop pa i a eu s’chique co pée, i a minme pos mingé s’n’assiette ed rassakache.
Ben intindu l’cat i a été dins l’horloche pindant quinze jours, forchémint m’pa i faisot toudis à s’mote.
Au bout d‘unne s'maine, i savot à peu près rond’ler dins chele cité.
Seul'mint pour in arriver là i a minqué d’passer s’n'arme à gauche. Drot comme unne planke,i faisot l’tour ed chele cité. Ej l’ai ravisé rapasser huit fos ed’vant l‘mason, j’me diso i prind sin plaigi, et bin pos du tout mes gins, m’pa i savot pu arrêter s’pétrolette.
Vert ed troulle, i a cugi l’pu simpe, i a rintré dins l’aïure au bout de l’rue.
Résultat d’tout cha, i a fait un tro à s’marrone, sin queute i étot l’doupe d’avant et i y’ avot i unne poque à sin réservoir, même que cha faisot comme unne deuxième tiète à s’n’arodèle. Débousé m’pa i est ar’v’nu, unne fos d’pus in boutant s’pétrolette!
Man ale a toudis l’dernier mot, i étot à peine dins l’voyette qu’ale li dit « Trognon i a su d’vinte unne pétrolette d’mande li si s’commère ale peut pas rapiech’ter t’marrone ».
Mi j'raconte mes cacoules et l'tape alle est pos misse....Bon j'posse tout ed'su, ej va arpasser pu trad, pace que si i n'y autint ed monte qu'hier, ches moukes, alles vont avor bon timps...Adé

cartouche15/06/2010 08:31
eune tranche d'vie et bin racontée in pus

Retour au forum

Utilisateur

Mot de passe


S'inscrire
Mot de passe oublié ?

Google

Connaissez-vous
ce mot ?
en ch'ti:galaffe
français:gourmand
genre:n.m.
Accéder au glossaire