Accueil forums

Forum général (tout sujet)
Discussions de comptoir
Café littéraire
Le patois Ch'ti
Le Nord-Pas-de-Calais
Les mineurs et la mine
Légendes et contes
Recettes de cuisine
Histoires drôles
Demandes de traductions
Webmaster à votre écoute

Livre d'Or

Café littéraire
Sujet :Roman collectif
batisse02/02/2019 10:06
I a eune paire d'ins i s'avot écrit eune histoire collective au sujet des amours d'eune guernoule et d'un industriel de l'agro alimintaire rival de panzani.

L'jeu ch'étot qu'in mettot eune séquo de l'histoire et qu'in laichot quelqu'un d'autre continuer, in partint dins nin forchémint l'même direction.

Bon, vu qu'in ne va nin toudis buquer chu les mêmes, et pour nin faire du récauffé (d'autint que les nouilles récauffées, ch'est souvint nin bon) je propose qu'in se linche dins eune autre histoire d'amour qu'elle va faire verser des larmes dins les chaumières tellemint que cha sera émouvint et plein de baisses, avec deux s.

Et je propose que ch'coup ichi cha soche les amours d'eune tiote guernoule purte et sins malice qu'elle arot croisé le chemin d'un garchon nin tout à fait parel, qui s'a dit que cha ferot bin s'n'affaire un bieau rojin ainsi. Pour ceux qui listent vite je précise que j'ai écrit que cha ferot bin s'n'affaire et non qu'i li ferot bin s'n'affaire.

Ch'est évidint que ch'est un roman tout invinté et que, comme in dit, toute arsimblinche avec des caractères existints, même sales, serot eune purte coïncidince. Déjà in va printe des noms au hasard, disons Marie Théresse pour l'tiote guernoule et Paul André pour l'amateux d'ojons blancs bin tindres.

Quo que vous in pinsez?

Ah? I faut que je comminche... bon, allez, ch'est bin parce que ch'est vousautes.

In est un 1923, i neiche chu les terrils et les corons d'Auchel, in Boyauroucherie. L'tiote Marie Théresse, que même sins le trait d'union ch'est eune mauvaisse idée de li avoir queusi un nom parel vu que ch'est le brun à écrire avec un clavier, elle n'est in fait plus si tiote que cha. Inutile de vous faire un dessin. Ch'étot longtimps avint l'invintion de l'poupée barbie mais i avot un tiot peu de cha. Bref, l'grindissinte Marie Théresse, que dorénavint in appellera Barbie, elle étot déhiors sous l'neiche avec un bonnet gris à pompon chu s'tiête et un seau à carbon, noir et vude, à s'main. Elle trottinot vers l'barraque - ou cotche - pour rimplir sin seau.

Derrière l'barraque i avot l'rue. Eune bielle rue de Boyauroucherie, avec des pavés bin gros et bin ronds chu l'dessus, que même les fiers des gvaux ne risquottent nin d'user.

Alors qu'elle étot pinchée chu l'tas de boulets de carbon, occupée à in intiquer autint que possipe pour dins l'limite du portape avec ses forces de guernoule, elle a intindu comme un mauviard du côté de l'rue. Tiens qu'elle s'a dit, un mauviard qui chuffèle in plein hiver, quo qu'ch'est que ch't'affaire?

Du coup elle a tindu s'bielle orelle et elle s'a rindu compte que ch'mauviard i ne chufflot nin comme un mauviard, ou alors ch'étot un qui étot bin esquinté. Surtout que cha faijot des fos des tiots gling gling et des tiots tac tac. Comme elle étot loin d'être biête Barbie, elle a compris que ch'étot quelqu'un qui passot in vélo, in chufflotint de bonheur à l'pinsée de vivre dins un si bieau pays, surtout tchand que l'neiche elle arcouvre toute cheule crasse noirte.

Elle a souri.

Et cha a été fini d'un cop. I a eu un gros bling grammint plus fort que les autres. Les chufflots du mauviard étotent rimplachis par des jurons in patos après cheule neiche chu ches foutus pavés qui avotent foutu par tierre sin vélo au cyclisse. Et li avec par l'même occasion. Barbie elle écoutot avec s'bouque grinte ouverte. In arot normalemint dit avec s'guiffe qui pindot mais ch'étot tellemint eune bielle guiffe qu'in peut l'appeler eune bouque. Donc, elle avot s'bouque qu'elle béot vu qu'elle intindot eune masse de mots qu'elle n'avot jamais intindus dins s'majon, d'ùche que l'imbiince elle étot toudis tout chuc et tout miel.

N'écoutint que sin bon tchoeur, elle....

tiote belotte02/02/2019 14:15
a légèremint soulevé ses cotrons à deux mains pour courir, infin gliché pus vite vers cheule voix qu'elle intindot.
Min Diu Seigneur Marie joseph, qu'elle s'a écrié, mais quoque ché que c'bazar !
L'paufe cyclisse étot rétalé, l'tiête intiquée dins l'neiche, i étot passé par d'sus l'guidon d'sin vélo.... chés gampes arpliées... i étot à genoux.... Bref in vous fait nin d'dessin, vos avez compris (pis in peut nin faire dessin ichi !).
"Monsieur, j'vas vos aider à vous arlever, dit l'brafe Barbie, in li offrant sin bras pour qui prenne appui".
Cha faisant elle a pu vir qu'i avot d'forts bielles pinces à vélo qui artenottent l'bas d'chés maronnes pour que l'tissu i n's'prenne nin dins les raypns d'sin vélo.
et là d'un cop, in découvrant l'visage du faux mauviard sin coeur a fait BOUM ! (comme dins l'canchon de Charles Trenet, qu'elle pouvot nin connaitre pisque qu'elle n'étot pas cor parue !)...
Ch'est nin que ch'garchon étot bieau, ch'étot un gars fotr ordinaire (comme allot l'canter bin pu tard Charlebois) mais i avot quette cosse de fort charmant, chétot...
batisse02/02/2019 16:54
qu'i avot du poil à ses guimpes. Elle veyot cha parce que dins s'culbute à cul berlire, i a eune guimpe de s'maronne qu'elle s'avot arlevée.

Les poils is étotent noirs mais l'pieau de ses mollets elle étot blanque. In l'veyot à peine dins l'neiche. Heureusemint qu'i avot les poils in fait. Elle arot pouvu le printe pour un cul de jatte et cha l'a incore fait sourire vu qu'elle arrivot nin à imaginer un cul de jatte in vélo.

Elle a souri eune fos de puq - elle avot eune bonne nature Barbie - eune fos qu'elle a distingué, in plissint ses ys pour miux vir dins ch'blizard, que ch'étot nin un mauviard qui chufflot mais un co, d'après l'tale de ses mollets. Eune race de co à poils in quelque sorte.

Vous vous avez fait du mau min pauf monsi, à part à vou amour propre? Allez, accrochis vous à min bras, vous êtes apparemmint nin grammint plus lourd qu'un seau de carbon, cha devrot l'faire. Allez, in va s'armettre chu ses tiotes papattes hein? A m'mote que vous êtes bon pour cotinuer vou quemin à pids vu que vous roule avint elle a l'air d'avoir pris un sale cop chu s'guiffe. Elle aussi. Je dis elle aussi parce que vous avez eune sacrée bosse à vou front. I a même un tiot peu de sing. Venez avec mi à l'majon et m'mère elle va vous arringi cha et mettre du mercurochrome et un chatterton ou eune bande vielle peau. Min père i va sortir sin martieau et s'tenale et pourra suremint armettre vou vélo chu ses roules. Ch'est un as min père.

Oh oh oh ou ou ouais j' j' j'veux binbin qu'i a dit l'accidinté qui, dins sin malheur avot eu de l'chince, vu qu'i ne s'avot nin cassé de dints. Cha arot alors été un accidinté édinté et cha arot été cor pire à comprinte.
Au naturel i ne bégot nin mais là i étot un tiot peu sonné. Pinsez, i avot tché chu s'tiête, vu qu'i avot eune bosse. Ch ch ch'est d' d' d'ù? qu'i a demindé, in arprenint sin souffle intre chaque consonne.

Ch'est là qu'elle a dit Barbie in li montrint s'majon au bout du tiot gardin. Mais avint i faut qu'in passe par l'barraque - ou l'cotche, t'es de quel coin tisaute? - parce qu'i a min seau de carbon qui m'attind.

Mi je chus nin d'ichi qu'i li a dit in bégayint mais j'abrège sinon ch'est trop long, je chus de co co co... Colmar? qu'elle a demindé pour l'aider. M m meuh n n nan qu'i li dit, de co co co co Cocorico? qu'elle a demindé avec sin bieau sourire in coin in arpinsint à ses mollets. Tai tai tais te qu'i a dit. Ej chus d'co co co mais i parlot de moins in moins fort vu qu'i s'ingelot grave. In approchint s'bielle orelle à elle de s'bouque à li elle a compris qu'i dijot eune séquo du ginre "je chus de co.. j'chie à l'cour".

Elle s'a dit qu'elle avot tchée chu un drôle de zigoto, même si que ch'étot in fait li qui avot tché. Elle se demindot si que ch'étot nin trop risqué de l'faire rintrer à l'majon de ses parints.

In s'approchint de l'barraque/cotche...

tiote belotte05/02/2019 14:31
Barbie et mollet d'co qui fort galant portot l'seau d'carbon, ont pu vir l'rideau de cujine au crochet qui s'soulevot...
Barbie a tout d'suite busié que sin père ravisot l'coupe qui étot là dehiors, i devot s'deminder pouquo s'file donnot l'bras à un garchon qui n'avot pas cor été présinté à l'famile.
- Min diu qu'elle s'a dit, commint qu'min père va archevoir ch'garchon là qui n'est point d'ichi ! Père qu'alle a tout d'suite dit in rintrant dins l'majon, faut que j'vos raconte quoqu'y est arrivé à monsieur.... heu monsieur.... ?
- Paul André, Jules, Louis FERDINAND qui dit l'brafe garchon in sortant tout sin pédigré
L'père, l'mère et l'file étottent tout ébaubis, ben ouais d'uche qui étot l'prénom et l'nom dins tout cha !!!!! in a pas idée d's'appeler ainsi....
- Bon bin bienvenue ichi monsieur Paul André, Jules, Louis FERDINAND, mais c'mint qu'i faut vos appeler, et c'mint qu'cha s'fait que vos donnez l'bras à m'file et que vos avez une bosse sus l'tiête ? dit l'père qui n'avot nin quer teurner autour du pot.
- Appelez me Paul, in va nin faire d'menoule intre boyaux rouches ! Mes parents n'arrivottent nin à s'mette d'accord d'sus min prénom d'baptème alors is ont mis chés deux prénoms qui avottent chacun cuji et is ont rajeuté les prénoms d'mes pépères et i s'toufe que FERDINAND ch'est min nom d'famile. J'peux vos dire qu'à l'école cha n'a nin été facile d'écrire tout cha mais j'ai vite été l'premi in écriture ! Bon asteur j'vas vos raconter qu'commint qu'cha c'fait que vou file m'donnot l'bras, in tout bien tout honneur, Monsieur, j'voudros nin qui euche méprise...
- Min diu (décidemmint Barbie avot querre cheule espression !) qui cause bieau mollet d'co ! Barbie avot querre donner des surnoms à tertous.....

Eune fos l'histoire racontée l'mère à Barbie qui avot été querre pindant l'racontache tous chés pansements, compresses, huile de foe d'morue (in n'sait jamais cha peut toudis servir !) fit assir Paul André ETC.... d'sus l'pus bielle cayelle de l'majon et commincha à l'soigner, Paul André ETC.... ravisot avec appréhension l'boutelle d'foe de morue, ch'étot eune boisson qu'i détestot et s'demindot bin pouquo et commint de l'huile de foe de morue allot l'guérir ??? De l'huile d'olifes cha cha li arot plu.
Ichi pou l'compréhension d'l'histoire, i faut préciser que mollet d'co Paul André ETC.... avot fait sin service militaire in Provence et bin sur i avot appris à avoir querre de cheule huile d'olifes, li qui avot été élevé au beurre fait avec l'lait d'chés bielles vaques noirtes et blanques d'boyauroucherie.

- Bon asteur que vos valà soigné, Monsieur Paul André ETC, vos allez vos armette de vous émotions in mangeant queques crapettes, j'étos justemint in train d'préparer l'pâte quind vos êtes intrés dins l'majon, qu'elle dit l'brafe mère à Barbie qui étot eune cujiinière estraordinaire (s'spécialité chétot l'pâte d'lapin).

- J'vos armercie bin, dit mollet d'co qui s'demindot commint faire pou rester un tiot peu d'pus in présence de barbie, qui ne l'avot nin laissé indifférent. Mais mademoiselle, pemettez moi de vous deminder vou prénom, si que vou père et mère is veul'tent bin ?
- Min diu (incor !!!) qui cause bieau pinse Barbie... J'm'appelle Marie-Théresse mais tertous m'appelle Barbie. Ch'est eune gitane qui un jou a buqué à l'porte de l'majon, alle cachot eune boule d'christal qu'alle avot perdu qu'alle nos a dit, in a jamais compris cha que cha voulot dire, mais in ravisant dins m'main qu'alle avot attrapée alle m'a dit qu'eune certaine barbie d'l'an 2000 m'arsonnot.... Elle avot suremint eune touquette mais in a nin voulu l'contrarier. Comme cha nos a fait bin rire l'nom Barbie, tertous m'a depuis appelé ainsi....

- oh, Mademoiselle Barbie, si vos permettez, laissez me vos dire que ce prénom vous va à ravir, i a l'douceur des pétales d'roses au printemps...
Là barbie à failli querre à l'renverse devant c'compliment (mais qu'i cause bieau qu'elle s'disot!). Heureusemint y avot eune cayelle et alle s'a foque artouvée assise.

l'père qui veyot bin l'manèche d'mollet d'co dit.....
05/02/2019 17:51
Ouais bon, cha va hein... in veut bin te soigner, te donner à minger, mais ne va nin t'imaginer qu'in va te laichi foutre le bouvaque à l'majon in racontint à Barbie des séquos qui pourotent li faire perte sin bon sins in li mettint ses sins sins dessus dessous.

Là ch'est l'co qui a resté avec sin biec qui pindot, ébaubi li aussi, pinsint "vinguette i cause archi bieau monhomme, même si j'ai nin tout compris. Et pis i est au moins aussi malin que mi. I vot dins min ju. I dot être ardoutape à l'belote. Miux vaut l'avir avec mi que contre mi. Je m'in vas draguer l'père pour mettre l'file dins m'n'assiette. Pour l'instint in va se continter de l'assiette... i va falloir la juer fine garchon pour attirer ch'tiot rojin de tin côté."

Du coup i a chingé s'tactique d'abordache et i s'a adressé aux parints de Barbie pour les mettre dins s'poque, vu qu'i n'avot nin apporté d'assiette. De toutes manières, avec sin gadin elle arot été cassée.

Oh mes gins, que je chus bénaiche d'avoir tché devint chez vousautes, même si que cha m'a fait eune bosse. Vous êtes min tiot miraque. L'sainte famile. Je ne seros nin étonné que vous, mon bon monsi, vous vous appelez Joseph, et que vou charminte épousse elle s'appelle Marie. J'in chus à peu près sur. Commint que vous vous appelez?

Mi ch'est Gustafe qu'i a dit Joseph, et Marie elle s'appelle Hortense. J'espère que t'es nin dijeux de bonne avinture tisaute! Reste incore un tiot peu, je sins qu'in n'a nin fini de rigoler ch't'au soir avec ti. De toutes manières i n'avot rin de bieau au programme de l'TSF.

Tiens, Marcel Raoul Polo, vu que t'as un pinchint pour les fleurs, je vas t'in faire eune. Ch'est nin la peine d'essayer de deviner commint que ch'est nou nom de famile de crêche à tit jiju, je vas te l'dire mi-même, même si que je réalisse que ch'a nous inlèfe eune raison d'incore rigoler. Nousautes in s'appelle les Mattel et nou seule gloire à nousautes ch'est d'avoir créé Barbie. T'es nin trop défoutu?

Mais dins l'famile in a eu des inciiens qui ont été célèpes dins l'histoire. Le plus connu ch'étot Charles. Charles Mattel. I ne vivot nin à Auchel. I a fait le plus gros de s'carrière du côté de Poitiers. Ch'étot i a longtimps. Les gins et les fabriques ne connochotent même nin le carbon à ch't'époque. T'as qu'à vir dins quel brun is étotent les paufs. Li i s'avot ingagé dins l'armée, pour avoir s'n'artraite de bonne heure. Ah, l'artraite de bonne heure, tcheu bonheur... cha dot être dins nous gènes et ch'est peut être pour cha qu'in s'a ingagés dins l'z'houillères.

Bon, allez, minche incore eune crapette ou deux et in va in arvénir aux pétales de roses que t'as linchies à Barbie avint que ses tiotes guiboles elles ont fondu sous elle, pauf tiote. I parait que dins tin gadin à biclou t'as tordu des séquos et même peut-être eune pédale. Ch'est vrai?

Attinds, avint cha je voudros que te m'expliques eune séquo: je ne t'ai jamais vu dins l'quarti, ni dins ceux d'à côté. D'ùche que t'es et d'ùche que t'allos avec tin vélo avint l'aneigissache ichi devint?

Je chus de Cauchy à l'tour qu'i répondit Polo. I avot à peine dit cha que Barbie elle s'a mis à rire aux éclats, in serrint ses mains intre ses guimpes pour nin pichi à s'culotte. Eh ben m'file, quo qu'i t'arrife? qu'elle a demindé Hortense toute surprite. Et Barbie elle a répondu, avec des misères à récupérer sin souffle et avec ses ys qui brayottent de rire, qu'elle étot soulagée d'apprinte qu'elle avot mal compris tchand qu'i li avot dit, tout ingelé qu'i chiot à l'cour.

Les parints is s'ont aussi mis à rigoler tellemint fort que même les vijins deux majons plus lo is in ont profité.

Allez Barbie qu'i a dit sin père, à ch't'heure que t'es rassurée chu les lieux d'aisince de l'acrobate, allez cachi les ruines de sin biclou, amenez les ichi devint ch'fu et d'ichi là j'arai artrouvé deux tros otiles dins m'caisse au cagibi. In va essayer d'artaper le vélo aussi bin que sin pilote.

Ah? Z'avez un cagibi qu'i a demindé Polo... Barbie elle l'a arwetchi drôle et elle a dit, allez, viens, in va faire comme min père i a dit. Quo que t'in pinses?

A cha Polo i a un tiot peu levé ses épaules et i a répondu...





tiote belotte09/02/2019 19:32
ben j'pinses que ch'est drôle d'nom pou un cat, Gibi, mi j'ai un quien qui s'appelle Shadock, in devrot les présinter cha pourrot ête drôle, Gibi et Shadock.....
(*note de l'auteur : un descendant de Paul André, Jules, Louis FERDINAND est devenu au XXème siècle le réalisateur d'une célèbre série télévisée où certains pompaient)

Mais quoque té dis là li répond Barbie ployée d'rire, in a ben un cat mais i s'appelle Fougnette, ch'est le cat fougnette, té saisi l'l'cacoule? Alors té n'sais nin c'que ch'est qu'un cagibi ?

Ah, un cagibi en un seu mot, j'vos pas ben compris, qui répond Polo qui busiot dins s'tiête quoque cha pouvot ben ête..... I n'osot nin avouer à l'bielle jonne file qui n'savot nin à quo pouvot arsonner un cagibi

Allez viens, suis me et fais attintion d'ù que té mets tes pids quind in s'ra dins l'cagibi, faudrot pas laisser querre eune clé d'12 ou ben un martieau d'sus tes ortels....

Ah ouais !!!! (cha y est j'ai compris cha que ch'étot qu'un cagibi pinse in li même l'garchon)

Les valà tous deux arrivés devant un tiot bâtiment carré avec eune tiote porte in bos, peinte in vert, avec un coeur décopé dins le haut de l'porte

Mais qui dit l'garchon, ch'est nin un cagibi mais un cabinet !!!!

Barbie n'arrivot pu à s'arrêter d'rire in intindant cha. Mais non, min père i a trinsformé chés cabinets in cagibi pou ringer chés outils, ravisse i a fait d'bielles étagères qu'elle répond Barbie in ouvrant l'porte.
In effet, tout y étot bin ringé dins l'tiot réduit, chétot bin serré, fallot faire attintion, d'ù les arcommandations de barbie mais y a vot tout cha qu'in voulot là d'dins,eune vraie caverne d'Ali Baba sins les voleurs.

L'garchon, in tiot peu timite d'sus l'sujet n'osot nin deminder à barbie d'ù qu'is allottent au cabinet puisque cheux lal étottent trinsformés en futur Castorama.
Mais y étot quind même curieux l'garchon et y fini par dire : heu, mais alors d'ù que vos vos mettez pou faire, heu faire... infin té sais ben quo ?

Non j'vos nin qu'elle répond barbie, espiègle, in li faisant un tiot clin d'oel.
(L'garchon est devenu tout rouche !!!) allez, j'te fais marcher, in fait min frère (tiens alle a un frère s'dit Polo) ch'est in genre de "troufe tout", georges qui s'appelle mais in l'appelle Géo troufe tout... Ben min frère i est tout l'timps in train d'inventer eune séquo et i nos a treuvé un système d'toilette sèque qu'in a dins l'majon, dins eune pièche espéciale, et in est nin obligé d'sortir dins l'frod.
l'hiver pou aller d'ù qu'té sais.

Ben cha alors, Polo n'in revenot pas de cheule histoire ! Vos avez eune pièche espéciale pou chés cabinets ???

Ouais, et ch'est pas tout, dins cheule pièche in a aussi l'baquet pou s'laver avec un système qui fait que l'ieau alle arrive dins un tuyau, in fait quind même cauffer l'ieau hein ! in s'lave nin à l'ieau frode, mais min frère i dit que bintôt i va treuver un système qui f"ra que l'ieau sortira toute caude du tuyau, j'te l'dis min frère ch'est un original, mais ch'est pas tout, dins cheule pièche in a aussi...
10/02/2019 18:31
Eune lumière. Là Paulo julot, qui venot d'intrer dins ch'cagibi, i s'a ardréchi, vu qu'i a cru que l'tiote elle étot ébaubie par s'n'intelligince et s'vutesse à l'comprenotte.

In s'ardrechint i s'a mis s'tiête dins des arnitoiles comme is distent du côté d'Auchel. Merte qu'i a dit. D'autint qu'in puq i a buqué s'tiête chu eune batinse. A l'occasion cha li ferot eune deuxième bosse. Tcheu brun. Te parles d'eune journée.

Ouais, ben l'leumière ch'est nin ti hein qu'elle a dit ch'tiote barbie avec sin tiot sourire de fouteusse de gins que Mimile i n'avot nin incore capté. Cheule dont que je parle - parce que des fos is se linchotent à causer pointu à l'époque du côté d'Auchel - ch'est cheule du bouton eleuctrique, là. Bon, allez, in ne va nin rester là parce que ch'est le cagibi de ch'père et qu'i a dit qu'i y irot cachi des otiles pour réparer tin vélo. Si i nous trouve là cha va le contrarier.

I n'd'a eune à tin vélo, de leumière qu'elle a demindé barbie, quelle flairot le technicien?

Elle avot de l'sinusite.

Ouais qu'i a dit, mais i faut pouchi plus dur chu les pédales pour que cha éclaire bin et dins l'neige, comme aujord'hu, ch'est le brun vu que l'molette elle patine. Mais dis donc, avint qu'i aiche du courint eleuctrique dins l'cagibi de tin père, commint qu'i faijot pour y vir clair? I pédalot? Cha arot été eune bonne idée cha énon? Mi je troufe que ch'est eune bonne idée pour faire du courint. I faut juste, si possipe, trouver quelqu'un pour pédaler à nou plache. Quo que t'in pinses barbie?

Là i a fait comme Columbo bin des années après: i a feurmé un oeul et i a écrit "cagibi courint éleuctrique" chus sin carnet à zélastique, pour nin oblier.

J'in pinse qu'in va se faire ingueuler par min père si qu'in arvient nin à toute vutesse avec tin biclou qu'elle a dit barbie. Te m'as tout l'air d'eune rute amusette tisaute. Toudis à cachi eune séquo ailleurs que là d'ùche qu'in te dit.

Et, effectivemint, pindint qu'elle dijot cha, et que, brave file toute pleine d'annochinche, elle s'étot un tiot peu approchie de li pour li inlever les salissures qu'i avot dins les croles de s'tignasse, jules i se dijot que ch'étot bin de 90D qu'elle li mettot là sous sin nez... Pis elle sintot bon.

Ouais qu'i dit, t'as raison, allez hop, in court cachi le vélo. In pinsot surtout qu'i fallot vite qu'i artourne dins l'frod vif, sinon i arot des misères à cacher que l'tiote elle li fait de l'effet. A s'n'âche ch'étot aussi facile que gênint! Cha suffijot comme cha avec les bosses qu'i pinsot.

Donc is ont couru tous les deux dins l'frod vers ch'vélo qu'in devinot incore un tiot peu sous l'neiche, is l'ont pris chacun par un bout et is l'ont ramené, toudis in courint, dins l'pièche de vie, d'ùche que l'père i joquot avec deux tros otiles qu'i avot du trouver ailleurs qu'au cagibi, vu que les djones is avotent passé le plus clair de lu timps.

Eh ben qu'i a dit l'père, quo qu'ch'est que vous avez fait? In puq vous avez l'air bin essouflés. I s'avot sauvé ch'vélo? Ou i s'a incore fichu s'guiffe par tierre l'cauchy à l'tourrois?

Meeeuh nan qu'elle a dit barbie, qui pour l'première fos de s'vie, sins s'in rinte compte, défindot jules devint l'adversité. Ch'est foque qu'i fait frod.

Ouais ouais qu'i a dit ch'père in faijint malicieusemint à s'femme eune clinque avec s'n'oeul.

Bon, l'cauchilatouro, ch'est bin bieau de venir de ch'coin limite exotique, mais quo que te fais dins l'vie tisaute? Commint que cha ch'fait que t'as venu tcherre ichi in face de chez nousautes?

Ben voilà monsi Joseph at madame Marie, ve vas vous raconter. Et...

Retour au forum

Utilisateur

Mot de passe


S'inscrire
Mot de passe oublié ?

Google

Connaissez-vous
ce mot ?
en ch'ti:arcuire
français:cuire de nouveau, recuire
genre:v.
Accéder au glossaire