Accueil forums

Forum général (tout sujet)
Discussions de comptoir
Café littéraire
Le patois Ch'ti
Le Nord-Pas-de-Calais
Les mineurs et la mine
Légendes et contes
Recettes de cuisine
Histoires drôles
Demandes de traductions
Webmaster à votre écoute

Livre d'Or

Légendes et contes
Sujet :Ch' Gayant d'Aniche
Solenn6204/10/2004 13:45
Catégorie :Lu pour vous!

Ch' Gayant d'Aniche


Aveuc el biau temps, ches ducasses, in va arsortir ches Gayants. I séront ches vedettes ed leu ville, i séront ches rois et tout leu peupe fier d'amoutrer leu "légendaire arprésintant" à ches horzains d'leu villache. Légendaires ?… Cha n'est mie toudis vrai. Ben souvint l'naissance ed ches Gayants al est v'nue d'l'imagination des gins, in partant d'ein momint historique qui s'a vraimint passé, i arrife incor des fos qué ch'Gayant i arprésinte, tout in li faijant honneur, ein' corporation, ein métier disparu.

A Aniche, su l'quémin d'Douai à Denain, dins ch'pays du carbon et, in peut l'dire du minme, dins l'pays d'ches verriers (2 corps d'métiers aujord'hui in vau si qu'in treufe ein Gayant, i n'est pont né d'ein' légende et cha n'est ni ein carbonier ni ein verrier.

Qui ch'étot Ko Pierre, ech Gayant d'Aniche ? Ko Pierre (ch'est sin nom) cha 'té ein éfant d'Aniche mort in 1909. Ko Pierre i est v'nu au mon-ne à Auberchicourt (à côté d'Aniche) in 1834. Sin nom : Pierre Alexandre Joseph Consil, mort el 28 Décempe 1909 à l'âche ed 75 ans. Es tompe al est incor dins ch'ci-mtière du Cente d'Aniche.

Ecmint qu'cha s'fait qué l'citoyen Pierre Consil i est dév'nu l'géant d'Aniche ? Si ses parints i étotent d'ein' talle normale, Ko-Pierre i véïot l'bout d'ses ortels du haut d'ses deux mètes deux, et i'l'étot saprémint fort. Cheux qui l'avotent connu i ont raconté qu'i'l'ouvrot aveuc sin père marichau dé s'n état. Adon, l'diminche i voulot ein' pièche pou li sortir (ein' dringuelle) et sin père én' voulot pont li donner ; i plachot chl'incleume (60 kg) edsu l'amarre ; én pouvant l'armette à plache li minme, sin père i étot obligé d'y donner s'pièche. Ch'étot ein garchon d'bonne companie et connu à Aniche. Parti faire sin régimint i a 'té tambour-major. In puque ed ses 2 mètes, i portot ein bonnet à poils qui l'faijot incor pu grand.

Sin nom j'té i l'dot à sin père : ch'est li Ko Pierre qui cauffot ches fers pour sin père, à l'forge. Adon sin père i li d'mindot souvint : "ch'est caud Pierre ?". Ko Pierre i n's'a pont marié et ch'étot li l'sonneu à l'église, à l'fin dé s'vie (au début du sièque). I est mort à l'hospice d'Aniche.

Ko Pierre i a 'té ressuscité in 1913, habillé in tambour-major. Après l'guerre ed 14/18 Aniche i a oblié Ko Pierre, mais in s'a rapp'lé d'li in 1954. Adon i l'est dins tous ches fiètes.

Su s'tompe in peut lire :

"Ici repose Consil Alexandre Joseph décédé le 28 décembre 1909 à l'âge de 75 ans. Ex tambour-major. Décoré de la médaille militaire. Le plus grand tambour-major de France. Le géant Ko Pierre comme ses camarades l'appelaient. C'est lui qui lançait sa canne au dessus de la porte Saint Denis et qui fit courir toute la garnison de Paris".

Cha sérot-ti cha, arvife ein' deuxiinme fos ?

In tous les cas Ko Pierre i a (comme nous autes tertous) eu l'chance ed vénir au mon-ne dins nou région d'géants et d'avoir eu ein père qui parlot l'patois picard. Si cha quét in pourrot s'artreuver Gayant ein d'ches quate !… In peut toudis rêver…


Auteurs

Robert Mille Rosati





Retour au forum

Utilisateur

Mot de passe


S'inscrire
Mot de passe oublié ?

Google

Connaissez-vous
ce mot ?
en ch'ti:clerc
français:instituteur
genre:n.m.
Accéder au glossaire