Accueil forums

Forum général (tout sujet)
Discussions de comptoir
Café littéraire
Le patois Ch'ti
Le Nord-Pas-de-Calais
Les mineurs et la mine
Légendes et contes
Recettes de cuisine
Histoires drôles
Demandes de traductions
Webmaster à votre écoute

Livre d'Or

Le Nord-Pas-de-Calais
Sujet :la ducasse
BOUBOULE21/01/2006 19:13
Mot magique pour un ch'iot qui vient de Paris. Les frites, les géants qui font peur, les fléchettes (min père étot champio, il tirait les ballons). Les nougats.... Et vous la ducasse, c'est quoi ?
THERESE21/01/2006 19:34
Pour mi, l'ducasse ch'etot des jours d'fête. pour tout l'monde.

Quand j'étos jeune, in faijot del tarte au libouli dins toutes chés maisons, in décrochot eine porte, in mettot chés tartes d'sus et in portot cha à mon de ch'boulanger pour les faire cuire. J'peux dire que cha défilot dins chés rues.

Ch'étot aussi les cachuètes qu'in faijot grillées dins ch'four et qu'min mononque y vindot à l'ducasse.

Ch'étot chés casse gueules in féraille, ou bien chés bidets d'bos.

A Auchel ch'étot l'bal maguette du qu'chés viux et chés jenes y dansottent insemp'.

Là, sans médire sur chés fêtes d'asteur, tout l'monde s'amusot.

Cha durot plusieurs jours, et souvint l'mercredi y restot de l'tarte qu'al queuminchot à musir, alors in inl'vot l'piau du d'sus, in armettot du chuque et in l'arpassot au four. Ch'étot un régal, j'in bav'cor.

Et pi l'dimanche d'après ch'étot l'arbond.


bilouet23/01/2006 18:20
El' ducasse, ch'étot d'abord el fiête du villach'.

In faisot l'tour de l'famille : in buvot l'apéritif : du vin blanc chucré. A c'temps là, I n'avot point d'ricard, ni d'whisky. Ch'est venu lontemps après. Et, intre deux, y a eu l'Guignolet Kirsch suivi du Pernod.

Ch'étot l'occasion pou donner l'ringuelle aux infants pour qui puchent aller d'sus les manèges.

L'menu du repas, I étot traditionnel : du bouillon d'poule, de l'macédoine ed' légumes à l'mayonnaise, des "vols au vent", de l'langue ed boeuf avec les légumes du gardin, et du gambon avec del' salade. Et bin sûr, pour finir, el tarte del ducasse, au chuque ou au papin.

Et après, in faisot sin tour su l'ducasse et in d'allot au bal
ANDRE23/01/2006 21:31
attintion à ti, Bilouet, té vas êt' mal vu par Marie Claire, in dit nin du papin, in dit du libouli
camanette24/01/2006 07:33
ché marrant,in pus d'tout cha,mi je m'souviens d'chés boules d'coco colorées qu'in acato à ch'stand....et qui faisot mal à ché dints...
LA CLO24/01/2006 09:44
in a tous les mêmes souvenirs, mi aussi ch'étot l'fête. In plus, em mère ale aidot timps in timps l'patronne de ch'café tabac du bout dem 'rue alors pinsez quanque ch'étot l'ducasse in récupérot l'file du café i avot tellemint d'monte et du traval pour ches parints que l'tchiote ale passot 2 jours avec nous, s'mère ale donnot des tickets pour ches manèches. j'pinse à un juet que j'aimos bien et qu'in attropot dins del sciure ch'étot l'pèque aux cadios surprisses tchiots objets imballés dins du papier journal souvint. min préféré ch'étot in objet del forme d'eine tchiote pipe, mais ch'étot un ozio in mettot d'l'ieau ed'dins un soufflot dins ch'tube et cha faisot l'bruit d'un ozio. piou piou piou.! qu'ch'est loin tout cha mais j'min rappelle bien.
leon grossel24/01/2006 15:15


I n' n'a ti core un un d' vous z'autes qui s' rappelle du "casse - gueule Demandrille " qui s' installot sur les ducasses d' Auchel , Rimbert , Camblain et tous les villaches des environs , jusqu' à les années 55 ?.

Un casse gueule avec des chaînes qu' in dévot étamer d' emps in temps pour éviter l' rouille .Ses propriétaires , Alphonse et Mantine i z'avettent récupérer un camion militaire abandonné par les Inglais in 1918 pour saquer l' convoi et l' vielle roulotte in bos.

Ches plus anciens i s' souviennent pétête d' eune belle et grante jone file brune qui donnot ches tickets et faijot tourner ches sièches d' ches junes hommes jusqu' à n' pus pouvoir, pis qui les lachot pour les faire tourner comme des toupies. Alle s' appelot Gilberte , lu pétite file , et alle n' a fait rêver des junes hommes.

Après l' jone file alle a ténu eune confiserie et eune loterie alle a connu l' garchon de ch' tir ROGER , un mineur , i s' sont marier et ont vécu dins eune roulotte eune paire d' années . Ch'est là dins l' roulotte , au mois d' août , un lundi de l' ducasse d' Burbure , sur l' plache de ch' l' Arietz , qu' lu garchon i est vénu au monte .

Ach' t'heure , alle a 80 ans l' belle jone fille brune , et tous les ans j' va li offrir un bouquet d' fleurs à l' fête des mères.

Vlà chu qu' cha évoque pour mi l' mot ducasse.!

Bertrand

ANDRE24/01/2006 16:16
Mi, j'cros m'in souv'nir de ch'casse gueule, y s'installot su l'plache ed' l'Eglisse (à Auchel), sur ch'coin in face ed'du qu'y a ach't'heure el' boul'vard Basly....
Mi j'étos putôt interressé par chés chenilles ar'muchées, fallot bien préparer sin coup quand in invitot eun' file, pasque ch'étot nin ar'muché longtemps,... Pi y'avot ch'elle soufflerie, qu'al invoyot chés jupons au cent mille diap, Alors pindant qu'chés files y ar'ténottent leu cotrons, al z'avottent leu mains occupées et fallot in profiter.....
ANDRE24/01/2006 23:25
Y'avot aussi des balançoires (commint qu'in dit ? ) cha ar'sannot à eune barquette, In s'mettot à deux d'dins, et pi vas y, et ch'forain, pour nou faire arreter, y tirot sur un levier et y avot eun' planque qu'al'vénot freiner ch'eul' barquette par ind'sous.
Y a des cops, cha arrétot tel'mint sec qu'in s'artouvot les 4 fers in l'air au fond de ch'batiau....
loumarcel25/01/2006 07:20
in disot pas des "bilanchettes"?
leon grossel25/01/2006 09:19

Bon...i n'ont pas gramint d' mémoire ches gins là...ou bin i n' veutent pas dire...:


Qu' in tirot à l' carabine à ch' tir du Gros Léon pour gagner eune enveloppe avec d'sus un gros point d' interrogation..que d' dins in trouvot l' photo d'eune " pineupe " à moitié toute nute...!
Ou bin pour gagner eune grosse fleur violette in papier que Léon il aspergeot d'eune giclée d' mauvais parfum avant d' leur donner...

Qu' après in allot monter un tour aux " Vélos Zazou " ...que là i fallot avoir des bonnes gampes pour continuer à faire avincher ch' manèche in quart d' tour ..malgré que l' patron , Monsieur LEGRAND, il avot arrêté l' moteur...

Pis après , l' bouque pleine d' confettis qu' in avot archu presque à bout portant d'sur les " vélos Zazou " in allot monter sur les bilanchettes pour s' lancer au pus haut...jusqu' à faire sonner l' cloche quand in arrivot bétot à l' verticale...Alors monsieur Demeyer , ch' patron, i saquot sur un levier pour faire monter eune planque...et l' bilanchette allle trainot core d'sur l' planque deux tros fos avant d' s' arrêter.

Pis in allot s' émerveiller devant l' patronne de l' loterie...qui vous faijot vire qu' alle mettot des billets gagnants dins ch'mont d' billets devant vous...inroulés dins un pitit tupe in papier et qu' in comprénot pas pourquoi ch'étot toudis ch' voisin qui l' trouvot.

Avant d' aller arquaire sin ptit frère qui essayot d' attraper l' loupette sur ch' manèche d' éfants , in admirot ch' garchon des chenilles arcouvertes qui arrivot à sauter de ch' manèche in marche pour arkaire sur ses gampes juste devant l' caisse , avec les tickets qui vénot d' ramasser.

Pis in allot s' coucher , des rêves plain s' tiête , in attindos l' lendemain...pasque l' lundi i avot core ducasse...alors on coinchot intre ses dogts , eune douille d' balle qu' in avot ramassée par terre devant ch' tir , et in soufflot d' dins pour faire in sifflet...Ch'est là , in général , que m' grand-mère alle tapot sur m' tête in dijant " Arrête , té veux réveiller tout ch' coron ??".

Bertrand

LA CLO25/01/2006 09:50
pour el loterie mi cha m'énervot ed vire el patronne mette des billets gagnants, te faisos un effort t'in accatos plus pour avoir plus ed" chance et pis ... rien. Quand t'avos laissé un bon paquet d'sous l'patronne ale in r'mettot eine couche in t'faisant vire que dins ch'tas i avot toudis des gagnants, ale tournot tous ches billets et du premier cop ale in sortant un marqué gagné, pis ale le roulot à nouveau et ale remettot tout cha dins l'jeu.
ANDRE25/01/2006 11:26
Y'avot deux sortes d'tirs, mais mi j'ai jamais su les noms d'chés gins qui ténot'tent chés stands.

Ch'tir à l'carabine, aveuc des bosquettes, in pouvot faire des cartons, mais aussi, in tirot des tubes in plât', et in gagnot un espéce d'bouquet in plumet, du qu'y avot aussi souvint eun' photo d'pin'up.
Quand y'avot eun photo, in l'gardot pour nous, quand y avot que ch'plumet, in l'offrot à l'file qui faijot ducasse aveuc nous.

Y'avot ch'tir à l'carabine à fléchettes in caoutchouc, fallot viser l'nez d'un Poppey ou autre, et quand qu'in faijot mouche, cha nous rinvoyot eun'barette ed'nougat.Fallot l'rattraper au vol où bien t'allos l'ramasser au mitan de l'route.

Quand j'étos cor pu jone, j'allos à l'école Victor Hugo, et, pindant eun'paire d'années, à l'sortie d'école, l'dernier jour avant l'ducasse, chés forains qui avot'tent des manèches d'gosses, y les faijottent tourner gratuit'mint....Mon diu... Ch'est pu aujourd'hui qu'in verrot cha.

Ch'est aussi l'époque où in a vu l'premier manéche à sensation forte: Ch'étot " le Star" deux gros chabots au bout d'deux longs bras, cha comminchot par barloquer, pi cha finichot par rester tout in haut pindant quiqu'seconde.... Cha hurlot la d'dins, et y n'a gramint qui y laichottent un tiot souv'nir...
Y'étot installé juste in face ed' l'intrée de ch'l'Eglisse

Et chés baraques à frittes, du qu'in s'intassot dins chés compartimints, pour s'ar'donner des forches...

Té m'sanne êt' "très" proche des gins dont té parles, Léon, cha serot pon de t'famille?



leon grossel25/01/2006 14:51
J' va t' faire un aveu André...

J' sus né dins eune roulotte...un samedi d' août...à l' ducasse d' Burbure...sur l' plache d' l' arietz... :)

Cha esplique gramint d' affaire...et d'abord.. que sur l' ducasse..j' ai jamais payé un tour .!

Les fleurs et les plumets avec des files à moitié toute nute...j' donnos un coup d' main à mes onques et tantes pindant l' hiver pour les fabriquer in un tour d' mains...et ches " pineupes ".....j' les véyos avant tout l' monte...!!

Bertrand
ANDRE25/01/2006 14:56
Ch'est bien c'que j'pinsos, j'avos cru deviner.
THERESE25/01/2006 15:03
Mi, min mononque y vindot des boulettes sur chés ducasses et j'allos souvint avec li (j'avos pon drot à des tours d'manèges gratuits, cha s'comprinds) J'ai connu à ch'momint là, des filles de forains avec qui j'm'amusos. J'ai même couché dins leu roulotte. Mais je n'sais pu leur nom.
In déhors chés périodes d'ducasses, y restotent sur l'chaussée Brunehaut, après la guillotine in allant vers Ferfay. T'as p'têt connu ?
BOUBOULE23/03/2006 19:36
Le mot Ducasse est magique sur Auchel. Je vais imprimer tout cela et faire lire à ma mère. Moi, je me souvients des nougats, des cornets de frites et les géants qui me faisaint peur.

Bonne soirée.
jeanjean20/01/2007 16:31
Moi pas de grand chose car mes parents ne souhaitaient pas dépenser trop d'argent dans ces attractions. Je n'ai cependant pas été malheureuse du tout. LYLY
ch duc20/01/2007 18:57
mi jé r'appel bien éché vélos zazous et ch' gros léon chéeux qui ont fait el première ducasse du cinq grace a edouart ringard face àsin café!!!!!et dderière ché gardins y avot éch bal monté!!
jeanjean20/01/2007 19:16
J'ai connu les RINGARD. Ils avaient un câfé à la pointe de l'école BARBUSSE (Fille et Garçons) à CALONNE. Je m'en souviens trés bien.
pabqt23/02/2007 10:21
Qui ché ti qui a des photos deul ducasse d'Hénin ?
te m'rindro service.
vire min site en construction : pabqt.free.fr

pour me s'invoyer : pabqt@neuf.fr
pabqt13/01/2009 22:46
Une petite série de photographies sur la ducasse sur mon site, dans les places.
Le site sur Hénin a très fortement évolué, 6 à 8 heures de lecture le voir ici : ***://pabqt.free.fr

Très grosse partie sur les mines.

@+
cartouche14/01/2009 11:57
A L’DUCASSE
ah qu'j'avos ti quère aller a l'ducasse
in mingeos des frites bin grasses
in s'in lécot les dogts
in montant a bidets d'bos
cha guilot el long ed min minton
tellemint qu’ch’étot bon
qu'ch'étot bien quand j'étos tchiot
j'y arpinse ben des fos

BIERLAIR René dit Cartouche

Retour au forum

Utilisateur

Mot de passe


S'inscrire
Mot de passe oublié ?

Google

Connaissez-vous
ce mot ?
en ch'ti:dormache
français:sommeil
genre:n.m.
Accéder au glossaire